بقلم نانسى ابراهيم
ربنا هيحاسبك على كل لحظة ظلمت فيها نفسك وجيت عليها وتنازلت عشان ترضى غيرك اللى ما حاولش يوم يرضيك .
ربنا هيحاسبك عشان كدبت على نفسك مش على غيرك وصدقت كدبك على نفسك عشان تعديها وتمشيها وترسيها حتى لو رسيت عليك .
ربنا هيحاسبك على كل دقيقة عشتها ف حزن او خوف او خذلان لأنك سمحت لغيرك انه يصنع فيك كل المشاعر الوحشة دى .
ربنا هيحاسبك على كل لحظة سعادة ضحيت بيها لتفانيك تجاه شخص او شيىء او مكان او عمل اكتشفت بعدين انك لا تمثل ليهم اى شيىء .
ربنا هيحاسبك على كل لحظة ف عمرك بددتها ف انتظار حلمك الخالى م العيوب ، وفتى الاحلام المثالى ، والمحيط الوهمى الساحر الآسر اللى كان نفسك تعيش فيه .
ربنا هيحاسبك على كل موقف ابتسمت فيه وانت كنت المفروض تبكى ، وكل لحظة قلت فيها انك راضى وانت رافض ، وكل كلمة نعم قلتها لما كان لازم تقول لأ .
ربنا هيحاسبك على كل موقف خذلان حطيت نفسك فيه لما تخيلت انك مهم وغالى وعالى عند حد ثم اكتشفت انك مش اكتر من محطة وقوف او مكان انتظار عدى منه وعداك معاه .
ربنا هيحاسبك على كل وجع اتوجعته وألم أتألمته ولما اتسألت انت موجوع ؟ انكرت وقلت : خالص انا تمام التمام .
ربنا هيحاسبك على كل خير عملته ف اهل غير اهله ، وف مكان غير مكانه ، وف ناس ما يستاهلوش مش بس حتى انك تعرفهم … لأ انه يتقال انك بس عديت على نفس المكان اللى كانوا فيه .
ربنا هيحاسبك انك محبتش نفسك كفاية ، وتفانيت فى إسعادها ، وفضلتها ، وحطيتها فى مرتبة أعلى واهم قبل ما تحب غيرك أكتر من نفسك ، وتفضلهم عليك .
ربنا هيحاسبك انك ما طيبتش خاطرك ، وطبطت على روحك ، وحضنت قلبك ، وهدأت من روعك ، وخففتها على نفسك .
ربنا هيحاسبك انك استنيت وقت ما كان لازم تمشى ، وانك مشيت وقت ما كان المفروض تبقى ، وانك حزنت وانت المفروض تفرح ، وانك سكت لما كان المفروض تتكلم ، وانك اتكلمت وانت المفروض تؤسر الصمت .
ربنا هيحاسبك انك ظلمت روحك ، وفرطت ف حقك ، واتخليت عن فرحتك ، وأخرت سعادتك ، وعطلت أحلامك ، واستنيت تحقيق المستحيل .
ربنا هيحاسبك على فرحة قلبك اللى ادتها ضهرك عشان خايف من الخذلان ، عن فقدانك لشغفك ، وتخليك عن الامل ، وكل ثانية تملكك فيها اليأس .
ربنا هيحاسبك على كل لحظة أخلصت فيها لشخص مكانش مخلص ليك ، وكل موقف قمت فيه بدور بطولة مع شوية كومبارس ، وكل معركة قدتها للدفاع عن غيرك ونُصرته ف الوقت اللى كنت أنت محتاج اللى يدافع عنك وينهض لنُصرتك .
ربنا هيحاسبك على كل عمر ضاع ف وهم ، وألم اتحملته عن طيب خاطر عشان تخفف عن غيرك ، وكل ضربة كانت هتطال غيرك وصدرت وشك وقلبك عشان يتلقاها بدلاً عن غيرك .
ربنا هيحاسبك على سجنك لنفسك مع أشخاص رحلوا عنك بالموت واستطعمت الحياة معاهم فى قبورهم تحت الأرض أكتر من استطعامك للحياة الصابحة مع الاحياء على وش الأرض .
ربنا هيحاسبك عن كل حتة من روحك انتزعتها وحطيت بدالها بالونة أخدت نفس المكان من الفراغ ، لكن عمرها ما ملت المكان الفاضى من روحك .
ربنا هيحاسبك على مثاليتك وغباءك وتفانيك ف تصديق وعود ، او رهنك لسعادتك على أحداث أو مواقف أو أشخاص بعينهم .
ربنا هيحاسبك على طولة صبرك على مواقف ما ينفعش حتى تتخيلها مش تعيشها ، هيحاسبك على الضمير اليقظ اللى خلاك تفقد كتير عشان حابب تبقى بطل ونضيف ومثالى فى عالم أبعد ما يكون عن المثالية .
ربنا هيحاسبك على كم النعم اللى تناسيت وجودها، ونسيت تشكر ربنا عليها ، واختبارات القبول والرفض اللى خلتك تكون الانسان اللى بقيت عليه اليوم .
ربنا هيحاسبك على كل لحظة كتمت فيها معاناتك ، وبلعت فيها غصتك جواك ، لما اتكسرت فرحة قلبك ، ولملمت شتات نفسك ، وبدلت ملامحك ، وقررت تقفل عليك بابك ف الوقت اللى كنت محتاج فيها حضن يضمك ، أو حد يسمعك ، أو يد تساعدك ، أو شخص يكون سندك .
ربنا هيحاسبك على صحتك اللى بددتها ف الحزن ، ووقتك اللى ضيعته ف فرط التفكير ، وأوقاتك اللى راحت فى العزلة ، والحب اللى وهبته ف غير محله لأماكن وأشخاص ما قدروهوش ، ومجهودك اللى ضاع وانت بتحاول تحفر ف البحر ، او تنحت ف الصخر ، او تبنى قصور ع الرمال .
ربنا هيحاسبك على حسن النية ، وعلى الدمعة اللى بكيتها فى غير محلها ، وعلى الضحكة اللى مليت بيها أماكن كئيبة ، وع البناء اللى شيدته ف أراضى خربة ، وعلى عرقك اللى تصببته ف مشروعات محكوم عليها بالفشل .
ربنا هيحاسبك ع الجمال اللى غمضيت عينك عنه ، وع الناس اللى أشحت بنظرك عنهم ، وعن أحلامك اللى تخليت عنها ، وعن سعادتك اللى أعرتها للآخر الذى لا يستحق ، وعلى نَفس الحياة الأخير اللى وهبته لأشخاص موتى إكلينيكياً وبدل ما تساعدهم هما ع الحياة قربوك انت خطوة م الموت .
ربنا فعلا بسبب كل ده … هيحاسبك .
التعليقات متوقفه